范家豪整理
Play
客家話有一常用語「daˋ deu xi」，公部門原底用个詞彙「打鬥叙」，後來修改成「打鬥四」，引起客家鄉親熱烈个討論，講客委會也係教育部倒頭行！將一个正確个「打鬥叙」改成毋錯个「打鬥四」。其實不論「打鬥四」「打鬥叙」「打鬥聚」全部係著个，這流傳在民間个講法，何必硬愛用文字套落在其上？
這「打鬥四」个由來係在頭擺農業時代，幾下儕朋友各出一項東西，不論酒水、傍酒菜或者零嗒-相湊聚總到一位所在，啉茶、咈酒噡哆打冇訕(線)-因爭上早一般人家个食飯桌全係四方桌，故所以「打鬥”四”」為代表性，實際上，「打鬥」係相湊聚集个意思，而「四」為相湊人數，故所以人數來論「打鬥五」「打鬥六」「打鬥七」「打鬥八」-全都有人講。
各儕出一樣東西聚總共下，安到「打鬥四」；幾下儕去席店吃飯啉酒，平均分擔所費，安到「破竹笐」也就係現下講个AA制。
民間習慣用語，多有其特殊意思；吾等去爭論客家民間常用詞彙，假使毋去探討真實原由，而係強尋自認為意合个漢字，去否定原本詞彙形成个意涵。
